బెజవాడలో తెలుగు వెలుగు - సి.నారాయణరెడ్డిచే తెలుగుతల్లి విగ్రహావిష్కరణ

ఆంధ్రజ్యోతి :

సమకాలీన రచయితలు, సాహితీ విమర్శకులు, కవి పుంగవులు, మరెందరో కలం వీరులు! వీరందరినీ ప్రపంచ రెండో తెలుగు మహాసభలు ఒక్క చోటికి చేర్చాయి. తెలుగు సాహితీ సౌరభాలు గుబాళించాయి. మూడురోజులపాటు జరిగే ఈ మహా సభలు శనివారం విజయవాడలో... తుమ్మలపల్లి కళాక్షేత్రం బయట తెలుగు తల్లి విగ్రహావిష్కరణతో వైభవంగా ప్రారంభమయ్యాయి.

ఈ విగ్రహాన్ని ప్రఖ్యాత రచయిత సి.నారాయణ రెడ్డి ఆవిష్కరించారు. ఆహూతులకు అచ్చ తెలుగు సంప్రదాయం మేళవించిన సన్నాయి మేళం స్వాగతం పలికింది. రాష్ట్రం నలుమూలల నుంచేకాక దేశ, విదేశాల నుంచి సుమారు 1500 మంది సాహితీ ప్రియులు, రచయితలు ఈ సభలలో పాల్గొంటున్నారు. ఉదయం జరిగిన ప్రారంభ సభకు హాజరైన ప్రముఖులు తెలుగు భాషకు పట్టిన దుస్థితి గురించి, భాషాభివృద్ధికి చేపట్టాల్సిన కార్యాచరణపై చర్చించారు. ఎన్నో పోరాటాల అనంతరం సాధించుకున్న ప్రాచీన భాష హోదాను నిలుపుకోవడానికి శ్రమించాల్సి ఉందన్నారు.

మధ్యాహ్నం బెంజి సర్కిల్ దగ్గరలోని ఎస్‌వీఎస్ కల్యాణ మండపంలో ఏర్పాటు చేసిన 'సురవరం ప్రతాపరెడ్డి వేదిక'పై తెలుగు ప్రజల చరిత్ర - సంస్కృతి అనే అంశంపై చర్చాగోష్టి నిర్వహించారు. తెలుగు భాష చరిత్రకు సంబంధించి సమగ్ర గ్రం«థాన్ని వెలువరించాల్సిన అవసరంపై రెండున్నర గంటలపాటు ఆసక్తికరమైన చర్చ జరిగింది.

ఆ తర్వాత మండలి వెంకట కృష్ణారావు వేదికపై 'రాష్ట్రేతరుల తెలుగు భాషా సమస్యలు' అనే అంశంపై చర్చ జరిగింది. ఇతర రాష్ట్రాలలో ఉన్న తెలుగు ప్రజల భాషా సంస్కృతుల అణచివేతను అడ్డుకోవటానికి ఇక్కడి ప్రభుత్వం, సాహిత్య సంస్థలు సహకరించాలని వక్తలు అభిప్రాయపడ్డారు. అనంతరం కవి సమ్మేళనం నిర్వహించారు. ఎస్‌వీఎస్ కల్యాణ మండపంలో జరిగిన చర్చా గోష్టులు, కవి సమ్మేళనానికి వెయ్యి మందికి పైగా కవులు హాజరు కావడం విశేషం.

తెలుగు తల్లి ని హుస్సేన్ సాగర్ లో పడవేయాలని కేచరా గారు, 'మా తెలుగు తల్లి' గేయం ఉన్న పేజీలను చింపివేయాలని ఆయన మేనల్లుడు  'కారు' కూతలు కూసి వారం గడవక ముందే రాష్ట్రం లో తెలుగువెలుగులు విరజిమ్మాయి. డా సి.నారాయణ రెడ్డిచే తెలుగుతల్లి విగ్రహావిష్కరణ వేర్పాటువాద నాయకులకు చెంపపెట్టు లాంటిది. వారు తెలంగాణా తల్లినైతే కనుగొన్నారు గాని తెలుగు భాషకు  ప్రత్యామ్న్యాయం  చూపించగలరా?ఆ పని వారు  చేయగలిగితే వారిది అనేది ఏమైనావుంటే వారికి తప్పకుండా ఇచ్చేయవచ్చు